Kategori: Uncategorized

Prishtinë, 02 qershor 2026 – U.d. Drejtori i Përgjithshëm i Agjencisë për Administrimin e Pasurisë së Sekuestruar dhe të Konfiskuar (AAPSK), z. Alban Sutaj, së bashku me bashkëpunëtorë, priti në takim përfaqësuesit e agjencisë franceze për bashkëpunim ndërkombëtar dhe zhvillim “Expertise France”: znj. Pauline Girerd, znj. Armelle Giraud, z. Didier Fanack dhe z. Cyril Lacombe.

Gjatë takimit, z. Sutaj prezantoi rolin dhe përgjegjësitë e AAPSK-së, si dhe rezultatet dhe të arriturat në administrimin e pasurive të sekuestruara dhe të konfiskuara.

Ai theksoi rëndësinë e digjitalizimit dhe menaxhimit të të dhënave në administrimin e pasurisë së sekuestruar dhe të konfiskuar, forcimin e kapaciteteve profesionale dhe standardeve operative të AAPSK-së, si dhe ripërdorimin social dhe transparent të pasurisë së konfiskuar si instrument në luftën kundër korrupsionit.

Nga ana tjetër, përfaqësuesit e “Expertise France” shprehën interesimin për të vazhduar mbështetjen ndaj prioriteteve të ardhshme në kuadër të programit IPA 2026–2027, me fokus në sundimin e ligjit, luftën kundër korrupsionit, si dhe avancimin e proceseve të digjitalizimit dhe të sistemit të drejtësisë.

Prishtinë, 7 maj 2026 – U.d. Drejtori i Përgjithshëm i Agjencisë, z. Alban Sutaj, priti në takim Përfaqësuesin Rajonal për Evropën Juglindore nga United Nations Office on Drugs and Crime (UNODC), z. Danilo Rizzi, së bashku me znj. Jasna Pekic, Specialiste Rajonale për Rikthimin e Pasurisë dhe Luftën Kundër Korrupsionit në kuadër të UNODC.

Gjatë takimit u diskutuan format e bashkëpunimit ndërinstitucional, me fokus të veçantë në mundësinë e mbështetjes për zhvillimin e një katalogu dixhital, si dhe fuqizimin e kapaciteteve të administrimit te pasurive përmes trajnimeve profesionale dhe asistencës teknike.

Palët riafirmuan gatishmërinë për thellimin e bashkëpunimit dhe avancimin e projekteve të përbashkëta në funksion të ngritjes së kapaciteteve institucionale dhe promovimit të praktikave të mira profesionale.

Neum, 24–26 mars 2026 – Delegacioni i Republikës së Kosovës, i udhëhequr nga Udhëheqësi i Zyrës për Rikthim të Aseteve, z. Bahri Hyseni,dhe i përbërë nga z. Sami Istrefi, Drejtor i Sekretariatit të Këshillit Prokurorial të Kosovës, si dhe U.D Drejtorit të Përgjithshëm të AAPSK-së, z. Alban Sutaj, mori pjesë në një sërë aktivitetesh rajonale në fushën e konfiskimit të përfitimeve pasurore dhe menaxhimit të pasurisë së sekuestruar dhe të konfiskuar, të mbajtura në Bosnje dhe Hercegovinë.

Pjesë e delegacionit ishin gjithashtu edhe përfaqësues të institucioneve ligjzbatuese nga Policia e Kosovës, Shukri Rafuna dhe Burim Bazaj.

Gjatë qëndrimit në Neum, delegacioni i Kosovës mori pjesë në ceremoninë zyrtare të prezantimit të Strategjisë për konfiskimin e përfitimeve pasurore 2025–2031, ku u theksua rëndësia e bashkëpunimit ndërinstitucional dhe rajonal në luftimin e krimit të organizuar dhe korrupsionit.

Në kuadër të agjendës, delegacioni zhvilloi gjithashtu një takim pune me përfaqësues të FAZUOI dhe Zyrës për Rikthim të Aseteve, ku u prezantuan praktikat dhe përvojat më të mira në hartimin e strategjive, menaxhimin e pasurisë së konfiskuar, si dhe përdorimin e sistemeve digjitale. Në këtë takim, përfaqësuesit e Zyrës për Rikthim të Aseteve të Kosovës prezantuan zhvillimet dhe progresin e arritur në Republikën e Kosovës në këtë fushë.

Pjesëmarrja në këto aktivitete përbën një hap të rëndësishëm drejt avancimit të bashkëpunimit ndërkombëtar dhe fuqizimit të mekanizmave për luftimin e kriminalitetit, me synim rritjen e efikasitetit në identifikimin, sekuestrimin, menaxhimin dhe konfiskimin e pasurisë së përfituar në mënyrë të paligjshme.

Delegacioni i Republikës së Kosovës mbetet i përkushtuar për të vazhduar bashkëpunimin me partnerët rajonalë dhe ndërkombëtarë, në funksion të forcimit të sundimit të ligjit dhe avancimit të procesit të integrimit evropian.

Prishtinë, 17 mars 2026 – U.d. Drejtori i Përgjithshëm i Agjencisë, z. Alban Sutaj me bashkëpunëtorë priti në takim përfaqësueset e GIZ-it gjerman, znj. Bleta Kallaba dhe znj. Dorina Kurhasani.

Gjatë takimit u diskutuan mundësitë e bashkëpunimit të ndërsjellë ndërmjet institucioneve, si dhe format konkrete të mbështetjes për AAPSK-në. Në fokus të diskutimeve ishin veçanërisht mundësitë e mbështetjes nga GIZ në procesin e promovimit dhe sensibilizimit të opinionit publik lidhur me rolin, detyrat dhe përgjegjësitë e AAPSK-së.

Ky bashkëpunim synon forcimin e kapaciteteve institucionale dhe avancimin e objektivave strategjike të Agjencisë.

U.D. Drejtori i Përgjithshëm i Agjencisë për Administrimin e Pasurisë së Sekuestruar dhe të Konfiskuar (AAPSK), z. Alban Sutaj, ka miratuar Planin Strategjik për periudhën 2026–2028, dokument i cili synon fuqizimin e kapaciteteve institucionale dhe avancimin e proceseve të administrimit të pasurisë së sekuestruar dhe të konfiskuar në Republikën e Kosovës.

Ky dokument strategjik paraqet drejtimet kryesore të zhvillimit të Agjencisë për tre vitet e ardhshme dhe synon përmirësimin e efikasitetit, transparencës dhe profesionalizmit në administrimin e pasurisë së sekuestruar dhe të konfiskuar, në përputhje me legjislacionin në fuqi dhe praktikat më të mira ndërkombëtare.

Plani Strategjik është hartuar në konsultim me stafin drejtues të Agjencisë dhe me mbështetjen e partnerëve ndërkombëtarë, përkatësisht të projektit të mbështetur nga GIZ-i gjerman.

Me këtë rast, z. Sutaj shpreh mirënjohje për mbështetjen dhe bashkëpunimin e vazhdueshëm të partnerëve ndërkombëtarë, veçanërisht për kontributin e GIZ-it, ekspertes së angazhuar në kuadër të këtij projekti, si dhe të grupit punues që kanë kontribuar në hartimin e këtij dokumenti strategjik.

Prishtinë, 11 shkurt 2026- Agjencia për Administrimin e Pasurisë së Sekuestruar dhe të Konfiskuar (AAPSK) e Republikës së Kosovës dhe Agjencia për Administrimin e Pasurisë së Sekuestruar dhe të Konfiskuar e Republikës së Shqipërisë kanë nënshkruar Memorandum Mirëkuptimi, me qëllim të forcimit të bashkëpunimit ndërinstitucional dhe shkëmbimit të përvojave profesionale në fushën e administrimit të pasurive të sekuestruara dhe të konfiskuara.

Memorandumi është nënshkruar gjatë takimit zyrtare të mbajtura në ambientet e Ministrisë së Drejtësisë – AAPSK në Prishtinë, të udhëhequr nga u.d. Drejtori i Përgjithshëm i AAPSK-së së Kosovës, z. Alban Sutaj, i cili priti Kryeadministratoren e AAPSK-së së Shqipërisë, znj. Risena Xhaja, me delegacionin përkatës.

Gjatë takimeve u diskutua korniza ligjore për administrimin e pasurive të sekuestruara dhe të konfiskuara, praktikat aktuale të administrimit, sfidat institucionale, si dhe mundësitë për thellimin e bashkëpunimit teknik dhe profesional ndërmjet dy agjencive.

Me këtë rast, u.d. Drejtori i Përgjithshëm i AAPSK-së së Kosovës, z. Alban Sutaj, theksoi: “Nënshkrimi i këtij Memorandumi të Mirëkuptimit shënon një hap të rëndësishëm drejt forcimit të bashkëpunimit ndërinstitucional dhe harmonizimit të praktikave në administrimin e pasurive të sekuestruara dhe të konfiskuara. Ky bashkëpunim do të kontribuojë në rritjen e efikasitetit, transparencës dhe fuqizimin e kapaciteteve institucionale.”

AAPSK e Kosovës vlerëson këtë Memorandum si një bazë të qëndrueshme për bashkëpunim afatgjatë dhe zhvillim të mëtejmë të kapaciteteve profesionale në funksion të sundimit të ligjit.

Në kuadër të forcimit të bashkëpunimit ndërinstitucional ndërkombëtar, u.d Drejtori i Përgjithshëm i Agjencisë, z. Alban Sutaj, së bashku me stafin e Agjencisë:z. Enver Krasniqi

Drejtor i Departamentit per trajtimin e pasurise se sekuestruar dhe te konfiskuar; Violeta Ejupi- Hasani, Udheheqese e Divizionit per trajtimin juridik te pasurive te sekuestruara dhe te konfiskuara si dhe Znj. Goce Ismajli-Gjyshinca, Udhëheqëse e Divizionit për Pranimin dhe Vlerësimin e Pasurive të Sekuestruara dhe të Konfiskuara, realizoi një vizitë pune në Paris, me ftesë të Drejtoreshes së Përgjithshme të Agjencisë për Menaxhimin dhe Rimëkëmbjen e Pasurive të Sekuestruara dhe të Konfiskuara (AGRASC), me mbështetjen e GIZ-it.

Gjatë kësaj vizite u zhvillua takim me znj. Sylvie Marchelli, Drejtoreshë e Përgjithshme e AGRASC, dhe bashkëpunëtorët e saj. Në fokus të takimeve ishin çështjet që lidhen me administrimin e pasurive të sekuestruara dhe të konfiskuara, me theks të veçantë në bazën ligjore dhe menaxhimin e aseteve komplekse, përfshirë kriptovalutat; ripërdorimin social të aseteve të konfiskuara nga krimi; fondin e konfiskimit; sfidat dhe praktikat më të mira në administrimin e aseteve kriminale, si dhe format e bashkëpunimit ndërinstitucional ndërmjet AGRASC dhe AAPSK.

Në kuadër të vizitës, delegacioni i Agjencisë vizitoi gjithashtu Ambasadën e Republikës së Kosovës në Paris, ku u prit nga Ambasadori i Republikës së Kosovës, z. Mehdi Halimi, së bashku me stafin e ambasadës.

Prishtinë, 29 janar 2026 – Ushtruesi i detyrës së Drejtorit të Përgjithshëm të Agjencisë për Administrimin e Pasurive të Sekuestruara dhe të Konfiskuara (AAPSK), z. Alban Sutaj, zhvilloi një takim online me znj. Jill Thomas, eksperte e angazhuar nga GIZ-i gjerman për mbështetjen e procesit të hartimit të Planit Zhvillimor Strategjik të AAPSK-së.

Në takim morën pjesë edhe znj. Monika Nastovska, këshilltare nga projekti “Luftimi i Flukseve Financiare të Paligjshme”, si dhe znj. Dorina Kurhasani dhe znj. Bleta Kallaba, po ashtu përfaqësuese të GIZ-it. Gjatë takimit u diskutuan modalitetet dhe hapat konkretë për zhvillimin e Planit Zhvillimor Strategjik të AAPSK-së për periudhën 2026–2028.

Z. Sutaj prezantoi detyrat dhe përgjegjësitë e AAPSK-së, si dhe vizionin strategjik të Agjencisë, me fokus në administrimin sa më efikas, transparent dhe të qëndrueshëm të pasurive të sekuestruara dhe të konfiskuara. Ai falënderoi GIZ-in për mbështetjen e vazhdueshme ndaj AAPSK-së, duke theksuar rëndësinë e kësaj bashkëpunimi për forcimin e kapaciteteve institucionale dhe avancimin e objektivave strategjike të Agjencisë.

Agjencia për Administrimin e Pasurive të Sekuestruara dhe të Konfiskuara (AAPSK) mori pjesë në takimin me misionin vlerësues mbi luftën kundër krimit të organizuar dhe korrupsionit, i cili u mbajt në ambientet e Zyrës së Bashkimit Evropian.

Në këtë takim, AAPSK u përfaqësua nga z. Alban Sutaj, u.d, Drejtor i Përgjithshëm i Agjencisë. Takimi u zhvillua me pjesëmarrjen e përfaqësuesve të institucioneve vendore dhe ndërkombëtare, përfshirë ZRA, LPN, MGB, MG, EUO/EUSR dhe ENEST.

Qëllimi i takimit ishte shqyrtimi i zhvillimeve të dy viteve të fundit në fushën e rikthimit, sekuestrimit, konfiskimit dhe administrimit të pasurive, në kuadër të ndjekjes së rekomandimeve të dala nga raporti i vlerësimit (peer review) i vitit 2022.

Gjatë takimit, z. Sutaj prezantoi progresin e arritur nga AAPSK-ja në forcimin e kapaciteteve institucionale, përmirësimin e kornizës ligjore dhe rritjen e bashkëpunimit ndërinstitucional, me qëllim të rritjes së efikasitetit në administrimin e pasurive të sekuestruara dhe të konfiskuara.

AAPSK mbetet e përkushtuar në përmbushjen e mandatit të saj ligjor dhe në forcimin e sundimit të ligjit përmes administrimit transparent dhe efikas të pasurive të sekuestruara dhe të konfiskuara.

Prishtinë, 14 janar 2026 – u.d. Drejtori i Përgjithshëm i Agjencisë z. Alban Sutaj zhvilloi një takim online me përfaqësueset e GIZ-it gjerman, znj. Bleta Kallaba dhe znj. Dorina Kurhasani. Gjatë takimit u diskutuan mundësitë e bashkëpunimit të ndërsjellë ndërmjet institucioneve, si dhe format e mbështetjes për AAPSK-në.

Në fokus të diskutimeve ishin mundësitë e mbështetjes së GIZ-it në procesin e hartimit dhe zhvillimit të Planit Zhvillimor të AAPSK-së, me qëllim të forcimit të kapaciteteve institucionale dhe avancimit të objektivave strategjike të Agjencisë.