Kategori: Uncategorized

Prishtinë, 19 qershor 2025 –Ushtruesi i Detyrës së Drejtorit te Përgjithshëm te Agjencisë, z. Alban Sutaj, mori pjesë në mbledhjen e Komitetit Drejtues të Projektit kundër Krimit Ekonomik (PECK III). PECK III është pjesë e një nisme bashkëpunimi të Bashkimit Evropian (BE) dhe Këshillit të Evropës të financuar nga Bashkimi Evropian dhe Këshilli i Evropës dhe të zbatuar nga ky i fundit.

Në takim u prezantuan raportet e fundit dhe u diskutuan rekomandimet për forcimin e efikasitetit dhe kapaciteteve në isntitucionet ligj-zbatuese.

Me ketë rast, z. Sutaj theksoj angazhimin e tij dhe institucionit qe përfaqëson për zbatimin e legjislacionit sa i përket menaxhimit te pasurive dhe adresimin e sfidave si dhe shprehu gatishmërinë për bashkëpunim në funksion të respektimit të ligjshmërisë dhe forcimit të sundimit të ligjit.

Prishtinë, 18 Qershor 2025

Në zyrat e Agjencisë, u.d.  Drejtori i Përgjithshëm z. Sutaj së bashku me Drejtorin e Departamentit te PVRShPSK-se z. Enver Krasniqi zhvilluan një takim me përfaqësuesit e projektit HAPE. Në takim morën pjesë znj. Ilaria Renelli, Udhëheqësja e Ekipit të projektit HAPE, dhe z. Ilir Bicja, Menaxher i Programit të projektit HAPE.

Gjatë këtij takimi u diskutuan mundësitë e bashkëpunimit të mëtejshëm dhe hapat që do të ndërmerren për avancimin e aktiviteteve në përputhje me objektivat strategjike të Agjencisë dhe të projektit të përfshirë.

Agjencia falënderon partnerët për angazhimin dhe bashkëpunimin e vazhdueshëm, duke vënë theksin te rëndësia e dialogut dhe bashkëpunimit për arritjen e rezultateve të qëndrueshme.

12 maj 2025 ,Në kuadër të bashkëpunimit rajonal, shkëmbimit të përvojave dhe praktikave më të mira në administrimit të pasurive të sekuestruara dhe të konfiskuara, delegacion i AAPSK-së, i udhëhequr nga Drejtori i Departamentit PVRVSHPSK z. Enver Krasniqi, me ftesë të Drejtorit të Agjencisë Federale për menaxhimin e pasurive te konfiskuara ne Bosnje dhe Hercegovinë, z. Emir Bashiç, realizoi një vizitë dy ditore në Sarajevë.

Delegacioni i AAPSK-së përbehej edhe znj. Violeta Ejupi-Hasani udhëheqës e Divizionit për punë normative-juridike, znj. Suzana Salihu ud. e Divizionit të shitjes PSK dhe znj. Goce Ismajli-Gjyshinca udhëheqëse e Divizionit për PRVPSK.

Delegacion i AAPSK-së u njoftua me të arriturat dhe sfidat e agjencisë si dhe lidhur me bashkëpunimin e Agjencisë me institucionet ligj zbatuese në Federatën e Bosnjës dhe Hercegovinës. Mes tjerash delegacioni i AAPSK-së vizitoj edhe disa biznese në administrim të Agjencisë Federale.

Delegacioni i AAPSK-se është pritur edhe nga Drejtori i Përgjithshëm i Policisë Gjyqësore të Federatës së Bosnjës dhe Hercegovinës z. Gjenado Groshom i cili njoftoji për bashkëpunimin ndërinstitucional me Agjencinë Federale dhe sfidat lidhur me konfiskimin e pasurive.Në fund palët u pajtuan për të avancuar bashkëpunimin për të ndërtuar një model të integruar  rajonal në administrimin e pasurive kriminale.Vizitën e mbështeti GIZ ( Deutsche Gesellschaft Fur Internacional Zusammenarbeit) përmes projektit që lidhet me luftën kundër flukseve të paligjshme financiare në Kosovë.

Ferizaj, 17 Qershor 2025

U.D Drejtori i Përgjithshëm i Agjencisë për Administrimin e Pasurive të Sekuestruara dhe të Konfiskuara, z. Alban Sutaj me bashkëpunëtor, zhvilloi një takim pune me Kryetarin e Komunës së Ferizajt, z. Agim Aliu.

Takimi u realizua me qëllim të diskutimit mbi pasuritë që ndodhen në administrim të Agjencisë në territorin e Komunës së Ferizajt, si dhe për të koordinuar veprimet institucionale në pajtim me dispozitat përkatëse ligjore.

Agjencia vlerëson gatishmërinë e Kryetarit Aliu për bashkëpunim dhe mbështetjen institucionale në funksion të zbatimit të ligjit dhe administrimit të duhur të pasurive nën kompetencën e saj.

Prishtinë, 12 qershor 2025

U.D Drejtori i Përgjithshëm i Agjencisë për Administrimin e Pasurisë së Sekuestruar dhe të Konfiskuar, z. Alban Sutaj, zhvilloi një takim pune me Nënkryetaren e Gjykatës Supreme të Kosovës, gjyqtaren znj. Mejreme Memaj.

Në fokus të takimit ishte menaxhimi i pasurive të sekuestruara, si dhe sfidat që lidhen me administrimin e tyre.

Ky takim përfaqëson një hap të rëndësishëm në forcimin e bashkëpunimit ndërinstitucional dhe garantimin e sundimit të ligjit në vend.

Prishtinë, 05 qershor 2025 – Ushtruesi i Detyrës së Drejtorit të Përgjithshëm të Agjencisë për Administrimin e Pasurive të Sekuestruara dhe të Konfiskuara (AAPSK), z. Alban Sutaj, mori pjesë në takimin e përbashkët të Këshillit Gjyqësor të Kosovës dhe Këshillit Prokurorial të Kosovës, ku u diskutua tema: “Menaxhimi i pasurive të sekuestruara dhe të konfiskuara”.

Fjalimet hyrëse në këtë takim u mbajtën nga z. Fejzullah Rexhepi, Kryetar i Gjykatës Supreme të Republikës së Kosovës dhe z. Besim Kelmendi, Ushtrues i Detyrës së Kryeprokurorit të Shtetit. Të dy theksuan rëndësinë e një menaxhimi të drejtë dhe transparent të pasurive të sekuestruara dhe të konfiskuara, duke theksuar se efikasiteti në këtë fushë nuk është vetëm çështje ligjore, por edhe një faktor kyç për rritjen e besimit të qytetarëve në sistemin e drejtësisë.

Gjatë takimit, për rolin e sistemit gjyqësor dhe prokurorial në menaxhimin e këtyre pasurive folën edhe Kryesuesi i Këshillit Gjyqësor të Kosovës, z. Albert Zogaj, dhe z. Ardian Hajdaraj, në cilësinë e Kryesuesi te  Këshillit Prokurorial.

Z. Alban Sutaj, në cilësinë e U.D. Drejtorit të Përgjithshëm të AAPSK-së, bëri një prezantim për sfidat me të cilat përballet Agjencia në Administrimin e pasurive të sekuestruara dhe të konfiskuara. Po ashtu, një prezantim mbi këtë temë e mbajti edhe Koordinatori Kombëtar për Luftimin e Krimit Ekonomik, prokurori Kujtim Munishi.

Diskutimi përfshiu çështje të rëndësishme si:

• Masat e propozuara për pasuritë e sekuestruara dhe procesi i miratimit apo refuzimit të tyre;
• Ndikimi i shitjes së aseteve të sekuestruara në rritjen e vlerës së tyre;
• Zbatimi praktik i dispozitave ligjore për sekuestrimin e telefonave dhe përdorimin e tyre si provë;
• Nevoja për nxjerrjen e udhëzimeve interpretative nga Gjykata Supreme.

Ky takim konfirmoi përkushtimin institucional për bashkëpunim të ngushtë ndërmjet agjencive të drejtësisë me qëllim të rritjes së efikasitetit në luftimin e krimit dhe menaxhimin transparent të pasurive të sekuestruara e të konfiskuara.

Tiranë, 3 qershor 2025

Në kuadër të forcimit të bashkëpunimit rajonal, një delegacion i Agjencisë për Administrimin e Pasurisë së Sekuestruar dhe të Konfiskuar të Republikës së Kosovës, i udhëhequr nga ud Drejtori i Përgjithshëm, z. Alban Sutaj, realizoi një vizitë dy-ditore në Shqipëri me ftesë të Kryeadministratores se AAPSK-së së Shqipërisë, znj. Risena Xhaja.

Gjatë takimeve, palët shkëmbyen përvoja dhe praktika të mira në administrimin e pasurive me burim të paligjshëm, me fokus në:

• Standartizimin e procedurave;
• Rritjen e transparencës dhe efikasitetit;
• Ripërdorimin social të pasurive të konfiskuara.

Delegacioni vizitoi një ndërmarrje sociale në Elbasan, të ngritur mbi një pasuri të konfiskuar, e cila funksionon si qendër përfshirjeje për komunitetin – një model frymëzues për nisma të ngjashme në Kosovë.

Drejtori i Përgjithshëm i AAPSK-së, z. Alban Sutaj, theksoi rëndësinë e ndërtimit të strukturave të qëndrueshme dhe shprehu përkushtimin për bashkëpunim të ngushtë me agjencinë shqiptare. Nga ana e saj, Kryeadministratorja e AAPSK-së së Shqipërisë, znj. Risena Xhaja, u shpreh:

“Kjo vizitë është dëshmi e qartë se besimi dhe vullneti për të bashkëpunuar në mënyrë institucionale përtej kufijve po jep fryte konkrete. AAPSK është e angazhuar për të thelluar më tej bashkëpunimin rajonal dhe për të përfituar nga praktikat më të mira evropiane. Kemi rënë dakord me AAPSK-në e Kosovës për të nënshkruar së shpejti një marrëveshje të re bashkëpunimi. Rasti i sipërmarrjes sociale në Elbasan tregon se pasuritë e konfiskuara mund të kthehen në motor zhvillimi dhe përfshirjeje për grupet në nevojë.”

Palët u angazhuan për të avancuar drejt një bashkëpunimi të qëndrueshëm në fusha me interes të përbashkët dhe për të ndërtuar një model të integruar rajonal në administrimin e pasurive me origjinë kriminale.

Prishtinë, 27 maj 2025

Në kuadër të përpjekjeve të vazhdueshme për të forcuar bashkëpunimin ndërinstitucional dhe për të përmirësuar menaxhimin e pasurive të sekuestruara dhe të konfiskuara, u organizua tryeze e rrumbullaket me mbështetjen e OSBE-së, e cila ka si synim kryesor rritjen e koordinimit mes institucioneve ligjzbatuese në fazën e sekuestrimit dhe shitjes së pasurive, në mënyrë që të ruhet vlera e tyre deri në përfundimin e procesit gjyqësor.

Fjalën hyrëse dhe prezantimin për punën e Agjencisë e paraqiti ud. Drejtori i Përgjithshëm i AAPSK-se z. Alban Sutaj. Takimin përmasë lidhjese online e përshëndeti ud Kryeprokurori i Shtetit z. Besim Kelmendi.

Te pranishme ne këtë tryeze ishin Kryetari i Gjykatëse se Apelit z. Valon Totaj dhe Kryeprokurori i Apelit z. Agron Bajrami; Gjyqtari i Gjykatëse Supreme z. Burim Ademi; Koordinatorin Kombëtar për Luftimin e Krimit Ekonomik z. Kujtim Munishi; Udhëheqësi i Zyrës për Rikthim te Aseteve z. Bahri Hyseni si dhe Kryetaret e Gjykatave Themelore te Kosoves dhe Kryeprokuroret e Prokurorive Themelore; Giovannino Di Persio Shef i Sektorit kundër Krimeve te renda dhe krimit te organizuar pranë Departamentit për rend dhe siguri publike te Misionit te OSBE ne Kosove si dhe partner ndërkombëtare qe mbështesin Agjencinë.

Qëllimi i kësaj punëtorie është të krijojë një platformë efektive për diskutim dhe përafrim të praktikave më të mira lidhur me administrimin e pasurive të sekuestruara dhe të konfiskuara, si dhe të theksojë rëndësinë e konsultimit të Agjencisë për Administrimin e Pasurisë së Sekuestruar dhe të Konfiskuar (AAPSK) në çdo fazë të procesit.

Në këtë takim, u diskutuan sfidat dhe arritjet në menaxhimin e pasurive të sekuestruara dhe të konfiskuara, duke vënë theksin tek nevoja për bashkëpunim të ngushtë midis Policisë, Prokurorisë, Gjykatave dhe AAPSK-së. U theksua roli kyç i Agjencisë në ruajtjen dhe administrimin profesional të pasurive, si dhe në ekzekutimin e vendimeve për sekuestrimin dhe konfiskimin e tyre.

Ud. Drejtori i Përgjithshëm i  AAPSK-së z. Sutaj falënderoi institucionet pjesëmarrëse dhe OSBE-në për mbështetjen e vazhdueshme dhe vuri në dukje përkushtimin e institucioneve për avancimin e bashkëpunimit dhe zbatimin efektiv të kuadrit ligjor, që siguron administrimin transparent dhe profesional të pasurive të sekuestruara dhe konfiskuara.

Punëtori të tilla kanë qenë pjesë e angazhimit të vazhdueshëm të institucioneve për të përmirësuar koordinimin dhe për të ndarë praktikat më të mira, me qëllim që të përballen me sfidat dhe të arrijnë objektivat e përcaktuara në luftën kundër krimit.

Në fund të punëtorisë, të gjithë pjesëmarrësit shprehën gatishmërinë për të intensifikuar bashkëpunimin dhe për të ndjekur hapat e mëtejshëm për finalizimin e proceseve në mënyrë efektive dhe të përgjegjshme.

Prishtinë, 22 maj 2025 – UD i Drejtorit të Përgjithshëm të Agjencisë për Administrimin e Pasurisë së Sekuestruar dhe të Konfiskuar (AAPSK), z. Alban Sutaj, u takua me Ushtruesin e Detyrës së Kryeprokurorit të Shtetit, z. Besim Kelmendi. Në takim morën pjesë edhe Shefi i Sektorit kundër Krimit të Organizuar pranë Departamentit për Rend dhe Siguri Publike të Misionit të OSBE-së në Kosovë, z. Giovannio Di Persio, si dhe z. Senad Shajkovci, asistent i programit në atë sektor.

Gjatë këtij takimi u diskutua rreth ngrirjes, sekuestrimit, konfiskimit dhe rikthimit të aseteve të sekuestruara dhe të konfiskuara, me fokus të veçantë në ngrirjen e pasurisë së fituar me vepër penale, si dhe mundësitë për shitjen apo shfrytëzimin e kësaj pasurie në përputhje me dispozitat ligjore.

Zyrtarët e OSBE-së ofruan mbështetjen e tyre për organizimin e punëtorive dhe aktiviteteve të tjera që kanë për qëllim të ndihmojnë prokurorët dhe zyrtaret e Agjencise në zbatimin sa më të mirë të dispozitave ligjore, në mënyrë që të parandalohen dëmtimet e buxhetit të shtetit dhe të palëve në procedurë penale.

Ushtruesi i Detyrës së Kryeprokurorit të Shtetit, z. Besim Kelmendi, falënderoi mysafirët dhe u zotua se do të vazhdojë bashkëpunimin në funksion të zbatimit sa më efektiv dhe të drejtë të dispozitave ligjore, në lidhje me ngrirjen, sekuestrimin, konfiskimin dhe rikthimin e aseteve të fituara me vepër penale.

Prishtinë, 21.05.2025

Në ambientet e Agjencisë për Administrimin e Pasurisë së Sekuestruar dhe të Konfiskuar (AAPSK), ud. Drejtori i Përgjithshëm, z. Alban Sutaj, së bashku me bashkëpunëtorë, priti në takim pune Koordinatorin Kombëtar për Luftimin e Krimit Ekonomik, z. Kujtim Munishi me bashkepuntor.

Gjatë takimit u diskutua mbi forcimin e bashkëpunimit ndërinstitucional, me fokus të veçantë në planifikimin para sekuestrimit të pasurisë dhe në mekanizmat për administrimin sa më efikas të saj.

Një nga çështjet kryesore të trajtuara ishte edhe mundësia e shitjes së pasurisë në fazën e sekuestrimit, me qëllim ruajtjen e vlerës së saj deri në vendimin përfundimtar të procesit gjyqësor. Ky diskutim synon të kontribuojë në përmirësimin e praktikave ekzistuese dhe në forcimin e transparencës dhe efikasitetit institucional në këtë fushë.

Agjencia mbetet e përkushtuar në ndërtimin e partneriteteve të qëndrueshme me institucionet vendore dhe ndërkombëtare, në funksion të sundimit të ligjit dhe administrimit të drejtë të pasurisë së sekuestruar dhe të konfiskuar.